 |
| زكرياء بوقرة يلقح ضد كورونا |
نشر الدكتور زكرياء بوقرة صورا على حسابه الخاص على الفايسبوك إثر تلقيه جرعة من لقاح فيروس كورونا مرفوقة بتدوينة يروي فيها تفاصيل العملية وهذا ما نشره :
ليوم تلقيت أول جرعة من لقاح Sputnik V.
صحيح صرحت قبل أنو النوع هذا موش أكثر واحد يعجبني أما زادا قلتلكم أنو كان يجيني الخيار بين أخيب تلقيح والفيروس على الف مرة بش نختار التلقيح.
هانا شفنا كلنا قداش الفيروس هذا مقلق وخطير.
هانا شفنا على عينينا ان لا الهريسة لا الزيت زيتونا لا الBCG ولا سيدي محرز يمنعنا.
صحيح الفيروس ما يقتلش الناس الكل ما يتعبش الناس الكل أما حد ما ينجم يضمن انك بش تكون من العباد الي يسلكوها كي يمرضو.
الحاجة الوحيدة الي نسبيا تنجم تضمنهالك هي التلقيح.
صحيح التلقيح موش باللازم يمنعك من العدوى، أما الي يضمنهولك هو أنو حتى كان مرضت عندك 95% حظ أقل بش تمرض مرضة خايبة.
هذا لواش يصلح التلقيح وهذا لواش ليوم انا لقحت.
خلي نحكيلكم توة كيفاش صارت العملية.
في فيفري كي حلو التسجيل الالكتروني قيدت حطيت المعلومات اللازمة الكل. صحيح الموقع رزين شوية أما كان توسع بالك معاه تسلك. البارح بعثولي ميساج قالولي بش نمشي للقبة نزرق.
قمت ليوم في الوقت ومشيت للمنزه.
كي التوانسة الكل يضهرلي كي تبدا عندك قضية في إدارة ولا مؤسسة عمومية من قبل ما تمشي تبدا يدك على قلبك. حتى كان كل شيء مريقل تبدا خايف من المعاملة متع الادارة والموظفين.
دخلت حاسيلو من الباب وكانت الصدمة.
عون حلي الباب بالضحكة في وجهو. حكاية فارغة هي أما المرحبا بيك الي قالهالي والتبسيمة كانو كافيين بش نحاولي الستراس الي كان عندي. فسرلي الparcour كيفاش.
أول حاجة caméra thermique تقيسلك السخانة.
كان لاباس تمشي المكتب التقييد تعطاهم الcode متع الميساج يثبتو انك في الليستة ويقيدوك.
بعد تمشي لطبيبة تسئلك على حالتك الصحية كان عندك حساسية كان مرضت بالكوفيد قبل...
بعد تدخل دزرق. عاملين 3 صفوفة متع 6 من ناس في كل صف. كي يفرغ صف تدخل أنتي والي يستناو معاك.
غادي تجيك ممرضة تحضر الجرعة متع التلقيح تقريبا 10 دقائق بش تسخن شوية وبعدها دزرقلك.
كي دزرق يشدوك 15 دقيقة اخرين قاعد بحذاهم يثبتو كان يصيرش أي قلق.
واكاهو هذا هو التلقيح كيفاش يصير.
الحقيقة اليوم انا معجب بدرجة النظام الي ريتها معجب بالتربية والاخلاق متع الاعوان الكل الي تعاملت معاهم.
تحس عباد فرحانة بخدمتها والاحساس هذا يتعدالك.
نشالله يقوى النسق متع التلقيح ونحافضو على جودة الخدمة والمعاملة الي ريتها ليوم.
إطاراتنا الطبية والشبه طبية من أحسن ما فما في العالم وقادرين ينجحو العملية كان السلطة تخلاهم يخدمو على راحتهم وتوفرلهم الظروف الملائمة.
عام صعيب تعدا علينا الكل.
خسرنا بارشا عباد عزاز علينا جراء السياسيين الي يحكمو فينا.
الاف التوانسة لتوة مازالو يتعذبو من المرض.
هذا الكل كنا نجمو نتجنبوه أما الي صار صار وتو يجي وقت المحاسبة.
أما ليوم عنا سلاح جديد ضد الفيروس الي هو التلقيح.
هذا لواش ما تخافوش وكان جاتكم الفرصة ما تفلتوش فيه.
ردو بالكم على رواحكم وعلى عايلاتكم راهو الخطر مازال.
شوية عزيمة نوصلو للصيف وتبدا تتفرهد شوية.
< blockquote cite = "https://www.facebook.com/bouguira.zakaria/posts/257073286001406" class = "fb-xfbml-parse-ignore" >
ليوم تلقيت أول جرعة من لقاح Sputnik V. صحيح صرحت قبل أنو النوع هذا أكثر واحد يعجبني أما زادا قلتلكم أنو كان يجيني ... تم النشر بواسطة Zakaria Bouguira - زكرياء بوقيرة on & nbsp؛ السبت ، 20 مارس 2021
إرسال تعليق